Rinat Sport 呈獻 - 接彈地波教波
上次講完接地波。今次又講下接彈地波。呢個技術亦都係五個基本接波技術其中一項。亦都係難度較高嘅基本技術之一。而5個基本接波技術包括:
1.) 正手
2.) 半腰波
3.) 地波
4.) 彈地波
5.) 高波
呢5個接波技術做得穩，對於業餘龍門黎講已經輸少1/3嘅波，特別係啲低級錯誤。因為往往有好多失波係對住我地黎射。因為基本手法做得唔好，穩定性低。明明接實都會變入球。所以呢個款波嘅基本功一定要練到好穩。
而半腰波同早幾日介紹嘅地波，以及半腰波，都係一啲動作相近嘅技術。來球大約係胸口以下嘅高度，所以用下手配口K腳黎完成。但係彈地波相對比教難嘅原因係要判斷個波回彈角度以及時間，先決定幾時出手同埋點接。加上要配合天氣，場地射因素，假設同一力量及角度射出足球，亦都會有唔同變化。最簡單就係球速嘅分別。
香港大部分人踢開硬地，仿草及地毯場三類，所以三個唔同場地個波回彈後嘅球速會有所分別，特別係落雨之後，球速會變得更快，更需考驗守門員反應同準備動作。如果連同真草場去計，球速最快應該係硬地同地毯，一落雨就要特別謹慎。個波吸左水會更快。其次係真草(除非靚場)，最慢應該係仿草。所以當落雨比賽時，習慣要預早多少少時間做彈地波嘅熱身，去熟習一下場地同球速。如果乾地計，次序就有啲唔同，真草球速最快，地毯場，仿草，最後係硬地。所以更需要嘅係早啲去球場熱身。
片中所教授嘅接波方法分開兩款，因應唔同個波高度配合唔同嘅接波方法。
低角度彈地波
呢類彈地波球速相對快，要非常準確預判到個波彈地後角度及高度，最後係彈地之後就立即中手。成功率相對較高。首先要留要來球方向同角度，利用移步稍為修正。其後下身呈K腳 (K腳解說: https://goo.gl/h21KQ8)，假如甩手都有腳將球擋停。上半身前壓，重心向前，手臂及前臂呈一個"C" 型。兩臂及兩手置中，要留要相距太闊引起甩手情況。球彈地雙手迎球，當球中手時雙手緊抱並上半身前壓前，利用手臂及上身包住皮球。當球停定後可以還原動作。如球速過快，亦可以利用scooping，將身體前跌，利用身體壓住/保護皮球。要留意接波時切勿向後跳「就」波，會令到甩手機會大增，應以Scooping保護皮球。
高角度彈地波
呢個情況相對用於對手長傳「吊球」，球回彈後會高於腰，所以接波方法與低角度完全不同。首先要準確預判落點，唔好比個波彈幾下先接，因為一彈有機會笠死，或者對手利用此空檔衝前射球。預判後站在球當點後一至兩個身位。相臂伸前，雙手呈W 狀(俗稱W手）等波彈地並接實。情況就同你雙手拍波後用W手接一樣。如果中手後個感覺將會甩手，不應將手下壓，此舉亦有機會導致「痾蛋」。應觸球後將手反轉以下手抱球。絕對有效減低甩手機會。
其實高角度彈地波去到實戰，如果對自己接高波有信心，唔應該比個波落地，因為彈地後容易出現錯誤判斷，結果笠死。主動啲嘅方法應該以接高波嘅方法接實轉抱球。
其實對於好多人黎講，彈地波相對難處理，由判斷個波角度與落點，而且彈地後變快可以好大，需要多練習先會提升準確性。以及踢真草球場或者落雨多做接彈地波熱身去熟習。
今次同大家分享住咁多先，如果大家有覺得需要補充或者唔明白嘅地方，都可以同版主講。
講到尾，有交流先有進步。希望黎緊有機會再同大家分享下。
Search